高价征求意见（周柏春，姚慕双）
周：一档一档曲艺节目。
姚：蛮闹猛啊。
周：迭个曲艺啊，使得观众能够笑口常开。我伲为子使观众大家要好好较能够大大较个笑一顿。个么就要动脑筋，学点…多学点知识伐。像天文地理啊、风土人情啊、或者是文学艺术、各种个唱腔、或者各地方个方言、或者刷刷字啊（书法）、猜猜谜谜子啊，侪要研究。
姚：挨挨挨挨！开头听听倒还好，听到后手来弗对哉呀。对个我伲侪要学，要学唱腔、要学方言、啥个要猜谜谜子啊？搿种么小囡孛相个物事呀！迭个不登大雅之堂。阿是啊？
周：弗容易哦，猜谜谜子弗简单哦。
姚：猜谜谜子么啥个弗容易呢？弗瞒侬讲我从小是猜个，迭种弗稀奇，弗上台面个。
周：个么搿恁样子，我有只谜谜子畀侬猜猜看好伐？
姚：哦，呵呵，试试看。
周：我拣难一眼个。
姚：挨，可以个，因为我从小是猜谜谜子个，我比较有经验。
周：千条线，万条线，落到河里看弗见。
姚：哼，真真蹩脚啊，迭个是勒落雨已经讲明白了，千条线万条线，落到河里看弗见，伊已经落到河里哉，推板伐。搭侬讲迭种物事啊，啊呀，弗上台面，不登大雅之堂。
周：再再、再来一只啊，小小瓶，小小盖，小小瓶里有荤菜。
姚：要么螺丝或者田螺，哎，推板哎。
周：哦，迭个，红箱子，绿盖头，开开来咬一口。
姚：迭个是一只只个柿子，哎，推板。啧啧啧。
周：爹爹是麻皮，娘么红皮，养出儿子白皮。
姚：长生果。哎，啥个路道我弄不懂呃，板要自家献丑，搭侬讲过迭种物事弗上台面个，我从小是猜谜谜子个，几十年哉。搿种，哎，启蒙个，推板个。
周：个么再调一只哦，迭只物事侬听勒浪哦。叫，侬来我也来，侬弗来，我也弗来，啥物事？
姚：侬来我也来，侬弗来，我也弗来。打百分。侬来我也来，弗来么大家弗来。嘻嘻，阿是，迭种物事便当，不假思索，想也覅想得个。
周：哦，迭个板打百分啊？我一个人随便打打五关也可以，我一个人扑克牌，自家，喏，发来发去，一个人四个人代表兜转来也可以个，一个人孛相牌弗可以啊，板要四个人一淘来个啊？
姚：弗、弗是打百分啊？
周：板要两个人，侬来我也来，侬弗来我也弗来。
姚：个啥物事啦？
周：挨，阿是弗晓得哉。
姚：迭只倒，迭只倒我弗太晓得。
周：葛咾一个人啦覅老家家，晓得伐。样样侪晓得个。
姚：啊，是是是。
周：我从小是猜个。
姚：哎，对对对。
周：个么，侬迭只物事哪恁弗晓得了呢？
姚：哦对弗起，对弗起。我弗够谦虚，忒骄傲。
周：呒没搿恁样子个呀。
姚：是个是个是个。
周：拿人家霉头触得咧，一塌糊涂。
姚：哦，我弗好弗好，打侬招呼。
周：个么大家老搭档咧，四十几年咧，讲得我咧，做人也弗好做咧。
姚：好了好了，覅动气咧，啊。
周：覅动气了，侬哪恁弗晓得呢？侬来我也来，侬弗来我也弗来呢？
姚：好了呀，哦哟，个打过招呼么算咧，个么啥物事，侬来我也来，侬弗来我也弗来。
周：（侬也弗来）唉，对伐啦，葛咾覅老家家，晓得伐？
姚：哟，侬哪恁一而再，再而三个啦！个么我打侬招呼咧，算咧。
周：阿是啊，阿是弗晓得咧。
姚：弗晓得。
周：葛咾啊，下趟啊，覅。。。
姚：又要来了！
周：XX清爽爽（开头两个字没听出来）
姚：我是骄傲，想弗到侬周老师比我还要骄傲。
周：侬来我也来，侬弗来我也弗来。
姚：个么讲么也畀侬讲过了，个么啥物事，侬来我也来，侬弗来我也弗来。
周：冷天辰光镶袖子管啦。
姚：咦。
周：清爽伐啦。
姚：咦，迭个哪恁。。。
周：对弗啦，清清爽爽。
姚：哪恁清爽呢？
周：侬来我也来，乃么一淘来，对伐啦。唉，侬弗来我也弗来，大家弗来，对弗啦。总弗见得一个来一个弗来，喔咾，抓上去哉。

姚：哦hoh hoh…高！
周：葛咾，一个人呀，覅老家家，晓得伐？哦。诺，再畀侬猜只，诺。对伐。远看像我，近看像我，仔细看看还是像我。啥物事。唉。
姚：呃呵，迭个晓得哉。倷娘舅。
周：哪恁娘舅呢。
姚：三代弗出舅家门呀。
周：我没娘舅个啦。
姚：哦，来哉！近看像侬，远看像侬，仔细看看还是像侬，侬一张照片。
周：照片平面个，我立体个，照片死个，我人活个。
姚：呃，个么啥物事啦？
周：唉，远看像我，近看像我，仔细看看还是像我。
姚：唉。啥物事啊？
周：是洋囡囡。
姚：哪恁会。。。
周：因为人家讲我只面孔像洋囡囡呀。
姚：去咯！介难看个面孔还洋囡囡咧。
周：葛咾，随便啥事体啦，晓得伐，好好较要向人家学习，覅窜勒前头。
姚：对对对。
周：懂么就懂，弗懂么就弗懂。知之为知之，不知为不知，是智也。
姚：对对对。
周：是伐，三人行必有我师，五步之内必有芳草。
姚：对对对对对。
周：得伐啦。真个老家家，欧，侪晓得个。
姚：好了呀，哦哟，侬哪恁又要来，侬个人哪恁反反复复个啦。
周：真是个，黄毛皮摊雪菜皮干，外瞅肥甘，其实像块臭豆腐干。
姚：啊！要死啊，拿我骂得来狗血碰头啊。阿是我现在弄得来变臭豆腐干哉啊。想弗到侬会得搿恁样子骄傲啦。哎，介些多年数拍拍四十几年哉，今朝侬个人完全搭平常变脱哉啦，我弄弗懂啦。
周：对对对。
姚：侬平常邪气谦虚。
周：对对对，交关对不起。
姚：今朝侬个人。。。
周：请侬原谅，啊。我、我迭个呢，自家毛病。葛咾，请侬多帮助，啊，请侬多批评，啊呵，我现在勒拉高价征求意见，请侬无论如何，侬向我提批评。呵呵，侬覅客气，谈谈看。
姚：必过言话讲转来，侬真要喊我帮助你，喊我搭侬提意见么，我实在提不出啦，讲心里言话，侬蛮好个，得伐，我哪恁提法子呢？是弗错个。
周：我搭侬四十几年老搭档了，啊，我现在高价征求意见，得伐，侬应该要向我提意见个。
姚：是呀，我实在提弗出，我觉着侬平常，弗论做人，弗论行为，蛮好呀。是伐。
周：我现在，侬迭恁样子，愿子弗对呃，得伐，应该帮助我。
姚：我帮助弗出么。
周：得伐啦，个我现在向侬，高价征求意见，侬应该帮助我，得伐。一个人呢，是搿恁样子个，啊，迭个小病啦，弗医啦，要成大病，小洞弗补啦，大洞吃苦。
姚：我我、我明白呀，乃我帮助弗出呀。
周：等到病入膏肓，服药无效，一命呜呼，悔之晚矣。
姚：是呀是呀，我晓得个呀。
周：所以讲，侬现在只搭我讲好言话，弗提意见啦，侬等于是一支麻醉针，麻醉我纯洁个心灵，好像是一块绊脚石，阻挡我前进个步伐。侬弗提意见啦，侬真是看我死啦。侬真是杀人犯，真是侩子手啦。
姚：啊！啥，一歇我变刽子手、杀人犯啦？刚刚臭豆腐干，现在升级升勒介结棍啊！啊。
周：无论如何，侬要帮助我个，侬弗好看冷铺个。
姚：侬还是真个呢，还是假个啦？
周：侬真个，侬向我提意见，侬无论如何侬要提个，
姚：喏，我现在看侬诚恳倒蛮诚恳。喏，侬真真想我要，搭侬讲，要喊我搭侬提意见呢，我实在提弗出。必过有一点，必过迭个也弗成熟个哦。侬考虑考虑，我听见人家讲，周老师样样蛮好，就是啥人要搭侬提意见呢，侬。。。有点听大弗进，喏，别样呒啥呀，蛮好呀。
周：完全正确
姚：唉，阿是啊。唉。
周：必过言话又要调转来，啊，一个人呢，人非圣贤孰能无过。
姚：唉，个当然当然当然。
周：世界浪向没错误人呢，事实浪向是呒没个。
姚：根本弗可能呃。
周：像过去恁介，有种人被认为是错误个，但经过历史检验，实际证明，他们终究是位伟大人物。
姚：不凡之人。
周：像古巴尼、达尔文、高尔基、普希金、爱因斯坦、居里夫人、杰克伦敦、马克吐温、李时珍、曹雪芹、蒲松龄、关汉卿，还有周、柏、春。

姚：啊！侬周柏春哪恁架得进啦？
周：喏，我一家门侪架进去咧。
姚：唉，差远咧，不能同日而语啦，啥个，侬周柏春架进去啦。
周：哪恁弗架呢，而且阿拉迭个名字交关响亮。
姚：哦？
周：是伐。
姚：讲名字响亮啊？
周：覅讲别样个，报起数来，点起名来，是交关好听。
姚：哦，哪恁啊？
周：得伐，架进去交关顺当啦，譬如像点起名来，唉，杰克伦敦（姚：到），马克吐温，（到），李时珍（到），曹雪芹（到），蒲松龄（到），关汉卿（到），周柏春（到）。好伐。顺顺利利通过，对伐啦。
姚：讲名字响亮，我姚慕双名字比你好较响亮咧，姚慕双！
周：唉。侬弗来事，侬弗来事个。
姚：哪恁弗来事个。唉，侬周柏春，我姚慕双！
周：侬架弗进个。
姚：哪恁架弗进个，让我架架看个么喏，帮帮忙咧。
周：点起名来弗好听个呀。
姚：好听个，唉，来来来。
周：杰克伦敦（姚：到），马克吐温，（到），李时珍（到），曹雪芹（到），蒲松龄（到），关汉卿（到），姚慕双（到~~~）
姚：侬哪恁搿恁样子喊个啦？
周：无论如何侬要帮助我，请侬提意见。
姚：弗是，我实在提弗出呀，同志啊。
周：大家老搭档咧，四十几年了。
姚：是呀是呀。
周：侬看勒老搭档个面浪，要向我提意见个。
姚：喏，侬真个搿恁样子讲呢，我真真提弗出，侬还好呀，一切蛮好呀。喏，就是有一点，是人家向侬提意见呢，侬有眼听大弗进，有常时要光火，别样呒啥。
周：完全正确。唉，必过言话又要调转来，是伐，有种人弗是提意见啦。有种人啦，是打击别人抬高自家啦。
姚：搿种人顶丘（坏，chieu），借提意见为名
周：讲么讲勒好听咧，大家四十几年老搭档咧
姚：唉。。。
周：搿种人交关卑鄙啦。唉，搿种人啦，真是好为人师、夜郎自大、油腔滑调、玩世不恭、不识时务、不择手段、无稽之谈、无理取闹、利令智昏、利欲熏心，真是人前背后，口是心非、两面三刀、挑拨离间、颠倒是非、混淆黑白、造谣惑众、浑水摸鱼、煽风点火、包藏祸心、好话讲尽、坏事做尽、罪行累累、罄竹难书、恶贯满盈、罪该万死、万人臭骂、要千刀万剐、要遗臭万年，打倒姚慕双！
姚：啊！赫赫赫！侬迭个啥个人啊，我倒还弄弗懂呀。哦，喊我提意见，弄到后来拿我大骂一顿，一而再再而三，侬迭个啥个人啊侬。
周：好咧，弗谈咧。
姚：好咧，走了。呒啥多谈了。
周：总而言之。
姚：啥物事啊？
周：我现在就一句言话。
姚：啥物事啊？
周：我诚心诚意。
姚：唉。
周：侬要向我批评。。。
姚：侬还要批评！
完
PS：最后一段压轴部分里向，周柏春先生妙语如珠、滔滔不绝、娓娓而谈、口齿伶俐，一枪头拿一长排成语侪掼出来，真真让我迭个扒台词个人，扒勒走头啊。。。
-- 章鱼叉烧