Mbauq:
Nuengx ndaw suen miz mak,
Beix cupbak hozhaenz;
Cam nuengx dah va'ngaenz,
Gwn saek aen ndaej mbouj?
Sau:
Go'mak youq ndaw suen,
Cuk ciengz sam cungz cab;
Sam bi giet aen mak,
Hanz fag cungj mbouj gai.
Mbauq:
Mak ciemh ngoenz ciemh rang,
Mbouj wngdang caiq daengj;
Mboujyawx seizneix caengh,
Mienx haethaemh hoj hen.
Sau:
Caih gou hen cix hen,
Liengh mbouj gven mwngz saeh;
Raen mak cix luenh ngeix,
Gaej caux saeh hwnj ndang.
Mbauq:
Vunz caeg bit caeg gaeq,
Mbouj raen saeh hwnj ndang;
Gwn saek aen makgam,
Lwnhdang mbouj miz saeh.
Sau:
Mwngz naeuz mbouj miz saeh,
Sawq gaex dou haeujdaeuj;
Faexhanz moeb gwnz gyaeuj,
Mwngz cij rox naeuz in.
Mbauq:
Aen mak youq gwnz go,
Naihhoz mboujndaej euj;
Da rez gvaqbae myeux,
Bak geuj ndwnj myaizsaw.