鹅，阿拉上海人等吴人叫做“白乌龟”。以前，勒了外来YP还呒没涌入前，上海郊区农村家禽侪放养了村前地头搿。暮春时分，正是香莴笋开始进入时令辰光。养白乌龟人家，用香莴笋叶爿饫（yu喂）白乌龟咯。笔者小辰光，垃拉小住浦东亲戚屋里辰光，经常从自留地拔了新鲜香莴笋，摘了叶爿，“戆。。戆”一叫，2只肥肥胖胖嗰白乌龟就跳了摇摆舞过来了。白乌龟欢喜吃呀，吃相难看又狼吞虎咽，一歇歇，就吃得来头颈变粗了，来勿及下去呀！。。。。迭嗰是白乌龟鼎鼎欢喜吃嗰“一荤一素”中嗰一素！
还有一荤，交关人想勿到咯。
“小清，钓癞团去哒。。。”隔壁阿荣，一早就做好了钓癞团用嗰钓具。一根短短细竹竿或者芦苇杆（勿能忒长，影响收货），头头子绑了80---100公分嗰尼龙线或麻线，勿用钓鱼用嗰钓钩，只是缚了一小段铅丝拗成嗰环，环上粘牢一小团生面粉即可。还要每人准备一只布兜，口子是用铅丝围成20公分见方圆圈（直径勿能忒大），作为存放钓到嗰癞疙疤用。
钓癞疙疤，勿同于捉田鸡，勿好到水田去。要到刚刚生长到50公分左右嗰棉花田里去钓。凭手感拿面团降到棉花丛中嗰地面附近，凭捏牢钓竿嗰手探测癞疙疤是否上钩。一歇歇，钓竿抖动、被东西朝下拖曳，侬覅急拉钓竿，手要稳牢、匀速、慢慢较但动作要连贯嗰提起钓竿，只见一只肥肥嗰、疙疙瘩瘩嗰癞疙疤紧闭大嘴巴咬牢吞没嗰面团临空吊了线下头，2只长腿凭空蹬踏。迭嗰辰光，侬要勿紧勿慢拿癞疙疤移到身前，另一只手同时拿布兜迎上去，套进猎物，癞疙疤一进暗暗嗰布兜，就会松口，自家落下去了。侬再手一折封牢布兜口，轻轻放了地上，用一只脚踏牢口子，就可以去钓下一只了。。。。。
最有趣嗰，是饫白乌龟或鸭子了。勿用杀、勿用烧，只需引来白乌龟搭一群鸭子，就翻开布兜，随意拿癞疙疤们倒出来就可。侬覅以为癞疙疤跳了高、跑了快，恰恰相反，白乌龟或鸭子，一看到癞疙疤，侪像色鬼扑小姑娘一样快，伊拉身体、头颈动作覅忒灵活噢！一口一只，生吞下去，四五十只癞疙疤，勒了7、8只白乌龟或鸭子面前，勿到分把钟，就全部消失了。。。。。迭嗰就是“一荤”！！
为啥要饫白乌龟鸭子癞疙疤呢？因为，春夏季，是白乌龟鸭子出蛋旺季，要补充蛋白质伊讲。听说，适当喂眼癞疙疤，蛋又大又勿腥气。