1、 假扮“是但”gee gut精
呢种人睇起身好似好易话为，问佢食咩都话“是但啦”，“冇所谓啦”，“你话事啦”。但係当你问佢食唔食某样具体食物嘅时候，佢就会开始啊吱啊咗，“火锅咁热气”“牛扒/炸鸡听落好济喔”“寿司冻冰冰”……呢种咁嘅口是心非狂人，分分钟逼你谂到头都爆。

2、 选择困难症重度患者
无论佢哋係咩星座，食饭嗰阵一定会变成天平座，“咦，呢个好似好正喔，呢个都唔错，但係我又想试呢个，唔知拣边样啊。”佢会谂好耐，又唔想人哋帮佢做决定，结果就係——有排等落单。

3、 食物开光大师
好唔容易上菜了，饥肠辘辘嘅你落起筷子，准备向可爱嘅食物落手，结果一句“咪住先，等我影张相先”“咁暗嘅，帮我打下灯啊唔该”“帮我影张啊，咦都唔好睇嘅，来来来换个角度，我左边面45度最好睇啊”，等佢帮食物开完光，你摩拳擦掌以为终于有得食，内心嘅暗喜已经浮于嘴角嗰阵，“不如等上齐嘢食再影多张啊”，啊~你杀咗我啦。

4、 试"毒"使者
菜上来，第一个食嘅你碟饭嘅永远係佢，但係佢哋相信“隔离饭焦香”，“我帮你试下味啊”“你嚿猪扒好似好正喔，借我食一啖啊”“你咪减梗肥嘅，五花腩咁肥，我帮你食咗佢啊”“我知你唔中意食叉烧，抵谂啲，帮你食咗佢啦”，于是乎，你见住佢毫不客气咁夹晒你啲餸，唯有咸菜送饭豉油捞饭啦。

5、 阎尖拣择美食家
佢哋拣饮择食最挑剔，连份几蚊鸡饭盒都唔放过，“咦，青菜淡茂茂嘅”“嚿鸡咁老，点食啊，咬都咬唔郁”，“啲肉咁难食，畀难民食嘎”，“啲咖喱整到成淠屎咁”，即时你都食唔落了。

6、 自由不羁豪放佬
啲渣啊骨啊随地lue，口水花喷喷，打乞嗤唔掩口，啲病菌喷晒我碟饭到。唧唧复唧唧，食嘢梗要唧，见到啲食物残渣喺佢微张嘅口入边挤来挤去，真係好核突啊。食嘢唧唧声我都勉强忍佢啦，咬完一啖唔够味又去蘸酱，太唔卫生啦，我唔想食你啲口水尾咯，不过佢讲“呢啲係我嘅lifestyle”，真係冇声出。

7、 唔睇手机会死星人
虽然我都明，大多数人生活都已经离唔开手机，不过，既然上咗菜就趁热食啦，“咪住，我复下条微信先”，跟住你见佢同时同几个人倾微信，跟住刷朋友圈，微博，门户App，直头当你哋冇到咁。于是你建议，“我觉得食饭都係大家一起倾下偈啦”，结果佢对眼都未离开过手机，“我係微信开咗个食饭群啊，大家有咩就入去倾啦。”真係呕血揼心口。

9、 他条淡定慢享家
你望一望表，差唔多两点了，好心提醒佢“不如食快小小啊，差唔多够钟返工了”，“好啊”。只见佢优哉游哉滋悠淡定，食米按粒食，食面按条食，切肉仲优雅过拉小提琴，你急到眼火爆，佢仲係他他条条，岁月静好。

10、 买单悭皮好贫友
你以为大家坐低各点嘅，偏偏有啲识计嘅点最多又食最多，买单就话AA啦，通常会有同样食得多嘅附和，好似你唔同意就好小气咁。有啲人咧一到买单缩沙，唔係去洗手间就係接电话，唔记得带银包，叫你俾住先，“下次还俾你， 点会差你嗰几蚊鸡啊”，通常都摞唔翻噶啦，佢哋总会唔记得，“有啲咁嘅事咩。”