1. 玛嘉烈同大卫喺嗰一程车遇上咗，然后就成为情侣。之后就做晒所有情侣都会做嘅事：行街、食饭、闹交、好返。恋爱根本就系“三幅被”，每对情侣行嘅路都几乎一样，浪漫完就要面对现实。玛嘉烈同大卫宜家就行到呢一步。
2. 所有话自己适合独居要有私人空间嘅人，只不过系未揾到一个人想同佢一齐生活。冇人天生系独家村嘅。玛嘉烈答应咗同大卫同居，好事嚟嘅。可以令一段感情更加立体，睇到情人嘅真面目。依一样都系挑战。
3. 佢钟意食完早餐先刷牙，佢就要刷完牙先食早餐；佢要开电视先瞓，佢就有光就瞓唔到。相爱好难，相处更加难。两个咁唔同嘅人要喺同一个空间相处，要互相迁就、妥协、忍让，就系为咗有人一齐返屋企呢一种感觉。
4. 情人可以同自己嘅朋友成为朋友系一件好事，但系当情人同自己嘅朋友做咗好朋友，就会系一个麻烦。“我和你”，到底系边一个我同边一个你呢？
5. 我钟意你钟意我……我钟意你钟意我……大卫反复谂住呢句说话。若果玛嘉烈系因为呢个理由同佢一齐，大卫觉得冇所谓，至少佢嘅付出有维系呢段关系嘅作用。唔系所有付出咗嘅感情都有价值。
6. 裂痕最初出现嘅时候，通常都冇人为意，以为过咗去就算。感情嘅缺口唔会一朝一夕形成，成日话畀第三者介入，其实第三者根本冇心。大卫觉得同Diamond见面系一个唞气位。通常闭一口气，闭得太耐，要唞嗰啖气就越大。
7. 思想系最难控制，叫自己唔好谂，就会谂得更多。玛嘉烈呢一刻唔想自己想入非非，但系佢控制唔到。一只又大又厚嘅手，依家喺佢嘅头、肩、颈；再落去，究竟会去到边呢？
8. 大卫最钟意食燶边嘅蛋，佢自己永远煎唔到。今晚玛嘉烈争住帮大卫煎蛋，佢想为大卫做返啲嘢，煎只蛋都好。大卫唔系食唔饱，佢只系想食返多啲嘢落肚，冲淡啲咖喱羊。
9. 呢度有两条锁匙，一条想留住玛嘉烈，另一条想打开佢个心。玛嘉烈将两条锁匙放埋一齐，佢想比较清楚呢两条锁匙嘅分别。偷返嚟嘅嘢永远都吸引过囊中物。
10. 大卫听到Diamond叫佢“道理王”忽然有一种甜蜜、亲切嘅感觉。曾几何时，玛嘉烈都系噉样叫佢。大卫以为只有玛嘉烈先可以畀到佢呢一种感觉，点解第二个人都可以嘅？可能太掛住一种感觉，系会令人产生幻觉。
11. 人与人之间最适当嘅距离就系适可而止。走得越近，感觉会越远；无论你几爱嗰个人都唔可以太亲近。喺天长地久之前，我哋要学识点样分开。
12. 好耐之前玛嘉烈为大卫煮咗一碗酸辣汤。大卫问佢“酸辣汤难唔难整啊？”于是玛嘉烈就解释咗一次酸辣汤嘅做法。今日，大卫想再问一次。佢希望可以返返以前，然后将酸辣汤嘅做法永远放喺心里面。
13. 我哋都习惯将回忆放喺心入面。不过有啲人会将回忆放喺个盒入面，然后再将个盒放喺心里面。系怕会失去呢种回忆，定系怕…怕佢会走出嚟呢？
14. 每个人要走嘅路都唔同。有人一直向前行；有人兜兜转转；有人倒后行。但系无论朝住边个方向去行，都会有机会遇上。感情嘅世界，其实都系一个循环。
15. 感情出现谜团嘅时候，我哋都会好想知道答案。但系唔系所有事情都有答案；唔系所有答案都系真相；唔系所有真相我哋都可以接受。
16. 好多年之后，大卫谂返起呢碗粥，仍然记得嗰种涩。而好多年之后，究竟佢身边嗰个系唔系玛嘉烈根本唔重要。因为有啲伤口，无论继唔继续同嗰个人喺埋一齐，都系永远唔会好。
17. 当发现自己变咗心，可能或者会觉得内疚。但系你最想嘅唔系向情人坦白，而系希望对方同你一样爱上另外一个。
18. 大卫选择相信玛嘉烈，明知道未必系真相嘅全部佢都选择相信。因为佢知道，维系一段关系最重要系信任。而且大卫明白，真话，系需要勇气先至可以讲得出口。
19. 你拥有自己爱嘅人系你嘅福气。但系有其他人同你一样，甚至比你更爱佢，呢一种系佢嘅福气。爱一个人，只系想佢快乐；快乐由边个制造，重要咩？
20. 人，唔会永远一心一意。总有那一刹那，会为其他人而动心。而其中一个心动嘅原因，系佢令你勾起快乐嘅回忆。
21. 人总会想拥有一啲唔属于自己嘅嘢。但系当真系有机会得到，又唔敢要。因为一要，就会失去自己。
22. 最难行嘅感情路，系要喺裂痕上面装作若无其事。从头嚟过，其实只系一个愿望。
23. 新生活令人充满期待，但系对于某啲人嚟讲，新嘅生活只系另外一种掩饰。因为佢哋仍然活喺过去。
24. 有人用一生嘅时间嚟留住一个人，但系对方只系用咗一刹那就决定离开。永恒嘅爱情，系嚟自单方面嘅心甘情愿。
25. 究竟离开需要勇气，定系留低需要更大嘅勇气？Diamond选择离开，大卫选择留低。佢哋两个，边个会快乐啲？
26. 爱情系一场持久嘅考验，要去到终点就要懂得回到最初。谂返起当初爱上呢个人嘅原因，然之后说服自己，继续爱。