阿聯：7分，進攻成功率高，但罰球同防守一般，上場時間唔多，應該係老友睇到無乜望，收埋休息好過等打下一場好過，通行做法。
尼高遜：8.5分，可以講喺唯一頑抗到底嘅球員，得分籃板助攻全隊最高，只係三分命中率唔高。
楊金蒙：4分，犯規多得分少，除咗個突破鏟籃無表現，翻去練三分同罰波。
周鵬：5分，十中二，幾次防守失位，其實如果仲傷緊，休息三幾場都係好事。
任駿飛：分，兩分三分全中，可惜就係起手次數少。
邵英倫：5分，憑積極搶到兩個進攻籃板，態度唔錯，只係，翻去練三分同罰波。
積遜：4.5分，三分唔入，兩分勉強有四成以上命中率，但係，12分入邊就得一波係中距離投射，其餘唔係上籃就係籃底拋射，罰波得五成命中率。難逃水貨之嫌。
胡明軒：4.5分，今場進攻無乜貢獻，一次突破分畀尼高遜入樽，一次BLOCK到福臣，成為少數亮點
周湛東：6.5，組織同以往一樣麻麻，只要場上同時無人識得帶波，基本就係半場搬運送貨，防守係勤力，就係唔見得效果好得去邊，但今場勝在進攻成功率高，三分全隊第二多。是否有持續高效表現，要觀察落去。
老友：5分，估計係準備唔夠，對對方無波走位，內線球員高位單擋然後鬼仔後衛突破鏟籃分波，防守無乜效，落後時暫停完之後都無起色，翻去真係要好好省下班隊員，然後諗下點應對下一場。
個人觀後感：1，今場進攻防守都唔掂，成隊打到無厘神氣，防守多次失位，人盯人跟到一半又突然唔跟，一係就三個人去夾人一個，驚死對方唔射三分，畀人一個單擋就空出成個位畀人起手三分，進攻時成碌木噉唔識得走位，好幾次一個人攞住個波，四個人企定定睇，內線球員畀人雙人夾擊時其他人又唔識得去接波，眼光光唔知搞乜。
2，進攻無突破分波+外線無三分，則容易變成內線單打獨鬥，所以幾個後生，都要加練突破同三分，王7就係版，過年時都可以帶麵包去球場自己練，或者資質每人都唔同，但論努力，後生唔應該輸畀前輩。
3，其實老友可以參照上季客場對廣廈，明知福臣命中率唔算高，寧願畀佢自己一個人帶波入到三秒區內面對高佬防守，都好過畀人做單擋時雙人夾擊，畀對方高佬有空位攻內線或者係傳畀外線射三分（對四川時就試過，只要對對方後衛夾得唔實，45度角同底角兩個位就會有一個射手空出，當時吳楠同孟達就係一人一波三分。）何況菠蘿西施典型歐洲內線球員，唔止可以爆內線仲可以射三分。所以應該堅持打人盯人，重點防死對方幾個射手。