大概系喺08/09年左右，我喺珠江台睇《任讲唔嬲》（唔知宜家仲有无呢个节目），主持人系任永全（我觉得佢好似陈启泰）。当时佢讲下讲下，突然嚟咗句书面语嘅“侃侃而谈”，而且佢系用普通话嚟讲，当时我觉得好愕然。本来呢个节目就系粤语嘅，而且佢作为一个省台嘅主持人，点解唔会用粤语讲“侃侃而谈”（事先无做功课）？或者用口语化嘅“吹下水”咁。
后来我留心同朋友嘅日常交流，发觉都会出现呢种情况：想用某个词表达某个意思，但只知道普通话读音，就会突然夹杂住普通话。有朋友试过讲电脑桌面嘅讲成“电（粤语）脑（粤语）桌（普通话）面（粤语）”。
记得我小学嘅每个教室门上都装咗一块牌，印住“请讲普通话”。粤语同普通话系我国两大语言，但感觉普通话有少少推进得太猛，我同事嘅小朋友喺屋企都讲普通话（佢系广州嘅）。大家有无遇到咁嘅情况？