【明報專訊】國學大師饒宗頤學術地位崇高，中央文史研究館、敦煌研究院與港大饒宗頤學術館，就特別趁饒老95歲壽誕，聯手喺甘肅敦煌搞咗個「莫高餘馥——慶賀饒宗頤教授九五壽誕活動」，除咗有敦煌學研究會外，仲展出饒宗頤教授150幅作品，包括饒老臨摹及繪寫嘅敦煌風格白畫及彩繪，寫經及木簡書風嘅書法等。有成500名內地、香港及海外嘉賓出席，當中仲包括民政事務局長曾德成、發展局長林鄭月娥同港大校長徐立之。
曾德成致辭 代表政府送對聯
德成局長噚日參觀咗饒教授嘅書畫藝術展，其後出席喺敦煌研究院陳列中心廣場舉行嘅壽誕活動開幕禮，並以主禮嘉賓身分致辭；及出席於莫高窟9層樓廣場舉行的壽宴。
德成局長大讚饒宗頤教授是名聞中外嘅學者，研究領域之廣、時間跨度之寬，世所稱頌。佢提到饒老從上世紀50年代已開始研究敦煌出土文物，仲去過印度學習，深入研究古印度梵文婆羅門經典；又喺研究過巴黎及倫敦所藏敦煌畫稿同寫卷後，出版多部有關敦煌嘅著作。佢仲代表政府送咗對刻有「翰墨潤千載 神思寄八荒」對聯嘅紙鎮畀饒老作為生日禮物。